erum við að stranda?

Ég held ég hafi aldrei talað um Bakkafjörumálið svokallaða hérna á blogginu, en eftir miklar umræður í fjölmiðlum (allavega hér í Eyjum) upp á síðkastið verð ég bara að fá að tjá mig um þetta stórmikilvæga mál sem snertir okkur öll sem hér á þessari eyju búum.

Nú er mikið rætt um undirskriftalista sem Magnús Kristinsson stendur fyrir á heimasíðunni ströndumekki.is þar sem um 2800 manns hafa skráð sig þegar þetta er skrifað. Ég renndi augunum í fljótu bragði yfir listann og gat ekki betur séð en að fólk sé að skrá börnin sín þarna (þá meina ég ungabörn) sem ég tel bara vera vitleysu. Í rauninni mun þessi undirskriftasöfnun gera lítið annað en að tefja framkvæmdir við Bakkafjöruhöfn þar sem ríkisstjórnin hefur þegar samþykkt þessar framkvæmdir. Af hverju kom þessi listi ekki löngu fyrr? Að setja þetta fram svona núna þegar allt hefur verið samþykkt minnir mann nú bara á mótmæli Ómars Ragnarssonar við Kárahnjúkum, og við vitum öll hvernig það endaði.

Ég get ekki annað en verið sammála bæjarstjóranum mínum í því sem fram kemur í svari hans þar sem hann er spurður út í undirskriftasöfnunina á mbl.is. Þar bendir hann á rangfærslur þeirra sem standa að þessari undirskriftasöfnun, þar sem þeir tala um að sjóferðin milli Eyja og Bakkafjöru verði 40 mínútur en réttur tími er 30 mínútur. Þeir tala um að ófært verði stóran part úr árinu en rannsóknir sýna að niðurfelldar ferðir verði ekki meiri en núverandi Herjólfur stendur fyrir.

Helsta vopn þeirra sem að undirskriftasöfnuninni standa er að mínu mati myndbandið sem þeir hafa til sýnis á heimasíðu sinni, á meðan helsta vopn þeirra sem styðja Bakkafjöru er yfir 100 blaðsíðna löng skýrsla frá Siglingastofnun með öllum þeim upplýsingum og svörum sem forvitnir og áhugasamir aðilar um þetta mál þurfa. Hana er hægt að nálgast hér. Ég byrjaði bara að lesa hana í dag og fann strax svör við mörgum spurningum sem ég hafði í sambandi við Bakkafjöruhöfn og hvort hún yrði áreiðanlegur kostur. Ég komst til dæmis að því að:

  • Rannsóknarvinna hefur verið í gangi frá árinu 2003
  • Bakkafjara er sá staður þar sem ölduhæð er hvað minnst við suðurströnd landsins, hún er í vari af Vestmannaeyjum
  • Farþegafjöldi ferjunnar verður vel yfir 300 manns og mun hún geta tekið allt að 36 fólksbíla
  • Siglingartími verður um 30 mínútur og gert er ráð fyrir 2 ferðum á dag, 4 yfir sumartímann en fleiri ef þörf krefur.
  • Öldumælingar yfir 26 mánaða tímabil sýna að 39 ferðir hefðu fallið niður á þessu tímabili, 36 að vetrarlagi og 3 yfir sumartímann.
  • Mörgum af þessum ferðum hefði verið hægt að hliðra um nokkrar klukkustundir og sigla þegar veðrnu slotaði.
  • Hefði það verið gert kom í ljós að um 15 ferðir hefðu fallið niður, allar að vetrarlagi.
  • Er sú tíðni frátafa sambærileg frátöfum Herjólfs sem að jafnaði verður að fella niður ferðir tvisvar til þrisvar á ári. (Þessi tala hefur nú reyndar verið að hækka, eða er það ekki?)

Mér finnst allt of mikið vera um að einlit umræða myndist um leið og eitthvað svona skýtur upp kollinum (sbr. ströndumekki.is) og mikilvægt að benda fólki á að skoða hlutina út frá báðum sjónarmiðum. Ég veit það að margir nenna að horfa á 5 mínútna langt myndband á YouTube, en ég veit það líka að margir nenna ekki að lesa yfir 100 blaðsíðna skýrslu… Þess má svo til gamans geta að skipstjórinn á Lóðsinum, Sveinn Rúnar Valgeirsson, sagði þetta eftir leiðangurinn sem þeir fóru upp í Bakkafjöru í fyrra, sem hefði kannski mátt fylgja vídjóinu:

Í sjálfu sér er ég ekki hræddur um að væntanleg ferja gæti orðið í hættu en ég óttast að minni skip gætu orðið fyrir áföllum við þessar aðstæður.”

Kynnum okkur málin áður en við ákveðum að við séum strand.

5 comments

  1. og svo er maður 2klst að keyra frá bakka og í bæinn… þannig að ef að ferðin tekur 30 mín og keyrsla 2klst þá eru við að spara alveg HEILAR 15 mínútur… Pottþétt eitthverjir sumarbústaðareigendur á suðurlandi sem vilja þetta…. heimska pakk… urrrrrr

  2. Þú ert í um tvo tíma að keyra til Reykjavíkur já og 30 mín að sigla á milli, og þar ertu með 15 mínútna styttingu á tíma Herjólfs í dag, þá áttu eftir að koma þér til Reykjavíkur sem tekur 30-45 mínútur eftir hversu hratt þú keyrir. Þarna er kominn tímasparnaður upp á 45-60 mínútur allt í allt en ég er alveg sammála því að ég myndi frekar vilja stórskipahöfn + nýjan og hraðskreiðari herjólf og þurfa að eyða minni tíma í keyrslu, en það er bara ekki í boði eins og er og allt of seint að fara að mótmæla þessari Bakkafjöru. Frekar að fá Eyjamenn til að standa saman og reyna að gera sem best úr því sem við erum að fá. Það er búið að leggja allt of mikið í þetta til að fara að draga allt til baka núna myndi ég segja…

  3. Já og þeir sem ekki tóku eftir APPELSÍNUGULA linknum hérna til hægri þá var ég að bæta honum inn… semsagt myndaalbúmið mitt gamla góða… margar mjög fyndnar myndir þarna frá því 20 fyrir Krist… 😀

  4. En er ekki líka talað um það að ef það er ófært í bakkafjöru þá eigi a sigla til þorlákshafnar og hvað á það eftir að taka langan tíma ??? Svo er annað sem að ég sé engan kost við að þegar maður er að fara til Akureyrar þá þarf maður að keyra í átta tíma í staðin fyrir að sofa í 3 í herjólfi og keyra síðan í 5 tíma. Eigum við líka ekki bara eftir að missa þessa höfn til landeyjarmanna þar sem að ef þetta gengur upp allt sem að ég vona fyrir okkur þar sem að það er ekki hægt að afturkalla þetta til þeirra, og svo smíði þeir stórskipahöfn þar og hvað verður þá um eyjar. Bara smá vangaveltur !!!.
    Ég er ekki alveg að treysta þessu og svo var ég líka að heyra að þessi höfn eigi eftir að vera eins og stokkseyrarhöfn sem er stórhættuleg en þetta heyrði ég nú bara og tek kanski ekki eins mikið mark á og þessu rannsóknarmönnum sem að þessu stóðu.
    En ég vil líka þá að ef einhvað kemur fyrir þá beri þessir menn ábyrgðina , hvað finnst ykkur???
    En ég er ekki búin að lesa þessar hundrað blaðsíður og kanski þegar ég er búin að því dreg ég álit mitt til baka .

  5. Ég neita að tjá mig um þetta mál.

    Eeenn ég var að skoða gömlu myndirnar og ég var að velta því fyrir mér hvort einhver ætti haglabyssu til þess að lána mér??

Comments are closed.